Паян  Чупайри  тĕп  шкулта  вĕренекенсем  Анисимов  Сергей Александровичпа  тĕл  пулчĕç.

- Шкул  алăкне уçсанах юратнă вĕрентекенсем, савăнăçлă  уроксем, кружоксем, спорт секцийĕсем   асăма  килеççĕ, - ăшшăн кулса хăйĕн  калаçăвне пуçларĕ Сергей. - Эпĕ ку  шкултан 2017-мĕш  çулта вĕренсе  тухрăм. Ун  хыççăн Вăрмарти вăтам шкулта  пĕлÿ пухрăм. Эпĕ мĕн  ачаран çар  çынни  пулма  ĕмĕтленнĕ. Хусанти танк  училищине хĕрлĕ  дипломпа  пĕтертĕм, офицер ятне  илтĕм. Раççей  Федерацин  çар  службинче  тăтăм. Хальхи вăхăтра Украинăра  ятарлă  çар  операцинче  службăра  тăратăп. Танк  командирĕ эпĕ.

Шкулта  вĕренекенсем ыйту  хыççăн ыйту пачĕç.

- Сергей, паян шкултан  вĕренсе тухнă  пулсан  хăвăрăн  паянхи профессие  улăштарнă  пулăттăр-и? -  кăсăкланчĕç ачасем.

- Эпĕ паянхи  кун та хамăн  профессиех  суйласа  илнĕ  пулăттăм. Тăван  атте-аннене, тăван  шкула, тăван яла юратăр. Çак  юратуран  патриотизм  туйăмĕ пуçланать.