Ака уйăхĕн 9-мĕшĕнче районти  ачасен пултарулăх çуртĕнче прозăлла хайлавсене илемлĕ вулакансен конкурсĕ иртрĕ. Ăмăртăва «Чĕрĕ сăмах» тесе ят панă. Вĕрентÿ министерстви ачасен чĕлхине аталантарас, чĕлхе илемне туйма вĕрентес, тăван чĕлхене хаклас, халăх умĕнче тухса калаçма вĕрентес тĕллевпе ирттерет çак конкурса. Халлĕхе çак конкурс  район шайĕнче иртрĕ. Çĕнтерÿçĕсем республика шайĕнче хутшăнĕç. Прозăлла хайлава вулама  13 вĕренекен хутшăнчĕ. Вĕсем 5 класран пуçласа 10  класс таран.

Хайлава илемлĕ  вулакансен текста питĕ лайăх пăхмасăр пĕлмелле, сăнара уçса кăтартма пултармалла, туйăмпа вулама, куракансене çавăрса илме пултармалла. Чупайри тĕп шкулта 8- мĕш класра вĕренекен Иванова Анна илемлĕ вулакансен  конкурсне  пысăк  кăмăлпа  хутшăнать. Регион шайĕнче те темиçе хут çĕнтерÿçĕ ята илме тивĕçлĕ  пулнă вăл. Хальхинче вăл Геннадий Никандрович Волковăн «Патриарх шăпи» эссе романăн сыпăкне вуласа 2-мĕш вырăн йышăнма пултарчĕ. Аня туйăмлă вулама пултарни куракансен кăмăлне кайрĕ.