Чăваш  халăх  поэчĕ Яков  Гаврилович Ухсай  çырнисем  пирĕн  литература аталанăвĕнче пысăк вырăн  йышăнаççĕ. Вĕсенче  чăваш  ĕс  çыннин кăмăл-туйăмĕ, шухăш-ĕмĕчĕ сăнарланнă.

Хăйĕн пĕрремĕш  сăвви «Юратрăм эп, хирсем, сире» пичетре çапăнса  тухсан Ухсай  Яккăвĕ  хăйĕн  илемлĕ  сăнлав пултарулăхĕ  пуррине туйса илет. Çак ĕмĕтех  ăна  Мускав  университечĕн  литература факультетне  кĕме  хавхалантарать. Кунта вăл 1930-1933 çусенче вĕреннĕ. Паллă  тутар  поэчĕпе  Муса Джалильпе  туслă  пулнă.

Яков  Ухсай çуралнăранпа  105 çул çитрĕ. Çак  çавра  çула  халалласа  паян районта «Юратрăм эп, хирсем, сире» сăвва сцена  çинче  илемлĕ вулакансен конкурсĕ  иртрĕ. Пĕтĕмпе 5- мĕш  класран  пуçласа 9- мĕш класс таран 19 шкул  ачи хутшăнчĕ. Вĕренекенсем  сăвва  чăвашла та, вырăсла та каласа  кăтартрĕç. Жюри пысăк туйăмпа вулама  пултарнине, тум, кĕвĕ, декорци енчен хакларĕ. Каласа хăварас пулать, вĕренекенсем  пĕринчен тепри  маттур. Чупайри  тĕп  шкулта  9- мĕш  класра вĕренекен  Никифоров Никита 8-9-мĕш класра вĕренекенсем  хушшинче «Юратрăм эп, хирсем, сире» сăвва чăвашла илемлĕ вуласа çĕнтерÿçĕ  пулса  тăчĕ. Никита  куракансем  умне Яков Ухсай пек тухса тăчĕ: шурă кĕпе, хура  костюм, пуçĕнче карттус, аллинче чăматан.

-Сывă-и, тăван  Слакпуçăм, кĕтсе ил хăвăн шухă ывăлна!- пуçларĕ Никита. Вăл сăвва çав тери пысăк туйăмпа вуларĕ. Вăл  вуланă çемĕн куç  умне  хир, вăрман, Слакпуç тавралăхĕ тухса тăчĕ. Маттур, Никита!