Эпир Чупайри тĕп шкулта 9-мĕш класра вĕренетпĕр. Часах  тăван шкулпа сыв пуллашмалли вăхăт çитет. Пирĕн ума пысăк ыйту тухса тăрать: малалла ăçта вĕренме каймалла? Пĕрисем Вăрмарти вăтам шкула малалла пĕлÿ пухма çул тытаççĕ, теприсем  тĕрлĕ вĕренÿ заведенийĕсене  хăйсем кăмăлланă професси енĕпе вĕренме кайма шухăшлаççĕ. Мĕнле професси  суйласа илмелле? Ку ыйту ачасене те, вĕрентекенсене те, ашшĕ-амăшне те хумхантарать. Шкулта прфессие тĕрĕс суйласа илес ыйтупа тĕрлĕ класс сехечĕсем, çавра сĕтелсем, тĕл пулусем иртеççĕ.

Раштав уйăхĕн 23-мĕшĕнче 8-9-мĕш класра вĕренекенсем  Вăрмарти механика заводне çул тытрăмăр. Пире заводра тĕп бухгалтер пулса ĕçлекен Венедиктова Галина Николаевна ăшшăн кĕтсе илчĕ. Заводра туса кăларакан  продукципе экскурси ирттерсе Федоров Владимир Филимонович тĕп инженер паллаштарчĕ. Кунта лифтăн тĕрлĕ пайĕсене туса кăларса Мускава ăсатаççĕ. Газ кăмакин тубулятор текен пайне туса кăлараççĕ. Тимĕртен авса мĕнле илемлĕ хапхасем, картасем, чечек лартмаллисем,саксем тунине хамăр куçпа курса тĕлĕнтĕмĕр. Какай  тĕтĕмлемелли  кăмака, сейф, çÿп-çап хумалли тимĕр карçинкка та кунтах туса кăлараççĕ иккен. Мартынов Алексей Алексеевич токарь пысăк ăста пулнине пире хайĕн ĕçĕпе кăтартса  пачĕ. Геннадий Михайловичпа Сергей Михайлович Александровсем ăста сварщиксем. Ахвань Галина Николаевна  тимĕр япаласене мĕнле сăрланине кăтартрĕ. 8-мĕш класра вĕренекен Анисимов Сергей  темиçе япала сăрласа та пăхрĕ.

Малалла эпир çăкăр пĕçерекен завода кайрăмăр. Кунта пире завпроизводство пулса ĕçлекен  Алефтина Григорьевна ертсе пычĕ. Çăкăр мĕнле пиçсе тухнине куртăмăр. Кунтах тутлă сухари тухать. Çеп-çемçе пĕремĕксене автомат пакета тултарса çыхса хурать. Тепĕр цехра тутлă напиток кăлараççĕ.

-Вĕренсе тухсан, пĕлÿ илсен механика завочĕпе çăкăр заводне  ĕçлеме килетпĕр, Кунти профессисем камăла кайрĕç,-терĕç Чупайри тĕп шкулта 8-9 класра вĕренекенсем.